Barson Ke Baad...

Barson Ke Baad Dekha Ek Shakhs Dilruba Sa
Ab Zehen Men Nahi Hai Par Naam Tha Bhala Sa

Abroo Khiche Khiche se Aankhen Jhuki Jhuki Si
Baatain Ruki Ruki Si Lehjaa Thakaa Thakaa Sa

Alfaaz The Ke Jugnu Aawaaz Ke Safar Men
Ban Jaaye Jangalon Men Jis Tarah Raasta Sa

Khwabon Men Khwaab Uske Yadon Men Yaad Uski
Neendo Men Ghul Gaya Ho Jaise Ke Ratjaga Sa

Pehle Bhi Log Aaye Kitne Hi Zindagi Men
Wo Har Tarah Se Lekin Auron Se Tha Juda Sa

Agli Mohabbaton Ne Woh Na-muradiyan Diin
Taaza Rafaaqaton Se Dil Thaa Dara Dara Sa

Kuchh Ye Ke Muddaton Se Hum Bhi Nahi The Roye
Kuchh Zeher Men Bujha Tha Ahabaab Ka Dilasa

Phir Yun Hua Ki Sawan Akhon Men Aa Base The
Phir Yun Hua Ke Jaise Dil Bhi Tha Aablaa Sa

Ab Sach Kahen To Yaron Hum Ko Khabar Nahi Thi
Ban Jayega Qayamat Ek Waqeya Zara Sa

Tevar The Berukhi Ke Andaaz Dosti Ka
Wo Ajnabi Tha Lekin Lagta Tha Aashna Sa

Hum Dasht Thay Ke Dariya Hum Zehr Thay Ke Amrit
Nahaq Tha Zoam Hum Ko Jab Wo Nahi Tha Pyasa