Qahat..

Na koi soch lafz banti hai
na koi khuwaab yaad rehta hai
Na koi baat guzray waqton ki
Dil ko dheeray se gudgudati hai
Na muhabbat sujhai deti hai
Na muhabbat dikhai deti hai
Na muhabbat sunai deti hai
Na koi shak dil main girta hai
Na koi dard muskarata hai
Aur judaai ki har azziyyat bhi
Ek kitabi si baat lagti hai
Ek ajab bay kali si rehti hai,
Dil ki baatoon main dil nahin lagta
Shaam ka lams Kuch Nahin kehta
Chaand raaton main dil nahin lagta
Qissa-e-wasl likh nahin saktay
Hijr ki baat keh nahin saktay
Ishq se door ho nahin saktay
Ishq ke saath reh nahin saktay
is tarah bay basi ke aalam main
Sach kahoon main tu aisay mousam main
Khaas chehra bhi aam lagta hai
Sha'ir kehna bhi kaam lagta hai......

By: Atif Saeed