Apnay Qarar-o-Qaul...

apne qaraar-o-qaul bhulaaye hue ho tum
naqsh-e-vafaa ko dil se mitaaye hue ho tum

pahale meree hansee mein rahaa karte the shareek
ab mere aansu'on mein samaaye hue ho tum

avval meree vafaao'n ke armaan the tumhein
ab khud vafaa se haath uthaaye hue ho tum

baazi thee jis bisaat par apnee jamee huee
naqshaa kuchh aour uss pe jamaaye hue ho tum

ghairo'n ka kyaa gilaa ki vah kambakht ghair hain
afsos apne hoke paraaye hue ho tum

khultaa nahee'n yah haal ki kyaa hogayaa hai tumhein
kyo'n ab yah haal apnaa banaaye hue ho tum

posheeda kyaa nazar mein koee raaz hai nayaa
meree taraf se aankh churaaye hue ho tum

rahane lage ho saamne mere kuchh iss tarah
jaise kisee ko mujhse chhupaaye hue ho tum

baa'n ee'n-hamaa vah cheez hai jaan-o-dil-e-''shameem''
jis cheez par nigaah jamaaye hue ho tum