Chehray Parhta...

chehray parhta, aankhein likhta rahta hoon
mein bhi kaisi baatein likhta rahta hoon

saaray jism darakhton jaisay lagtay hein
aur baanhon ko shaakhein likhta rahta hoon

tujhko khat likhnay ke tewar bhool gaye
aarri tirchi satrein likhta rahta hoon

tere hijer mein aur mujhe kya karna hai?
tere naam kitaabein likhta rahta hoon

teri zulf ke saye dhayan mein rahtay hein
mein subhon ko shaamein likhta rahta hoon

apnay pyaar ki phool mahakti raahon mein
logon ko deewaarein likhta rahta hoon

tujh se mil ke saray dukh duhrayon ga
hijer ki saari baatein likhta rahta hoon

sookhay phool, kitaabein, zakhm judai ke
teri sab soghaatein likhta rahta hoon

us ki bheegi palkein hansti rahti hein
jab tak ghazlein likhta rahta hoon