Phir kisi yaad ne shab bhar hai jagaya mujh ko
Kia saza di hai mohabbat ne khudaya mujh ko
Din ko aaram hai na raat ko hai chain kabhi
Janay kis khaak se qudrat ne banaya mujh ko
Dukh to yeh hai k zamane main mile ghair sabhi
Jo mila hai woh mila ban k paraya mujh ko
Jab koi bhi na raha kandha mere rone ko
Ghar ki deewaron ne seene se lagaya mujh ko
Yoon to umeed-e-wafa tum se nahi hai koi
Phir charaghon ki tarah kis ne jalaya mujh ko
Bewafa zindagi ne jab chor dia hai tanha
Mout ne piyar se pehloo main bithaya mujh ko
Woh diya hoon jo mohabbat ne jalaya tha kabhi
Gham ki andhi ne sar-e-sham bujhaya mujh ko
0 comments:
Post a Comment