Teri Guftugo Main....

Teri guftagu meiN hey jo chaashni jo terey laboN meiN halaavateiN
na suroor wo fasl-e-bahaar meiN na guloN meiN wo lataafateiN

kahaN reh gaeeN teri nigahateN wo sabaa kidhar ko nikal gai
teri aahattoN ko taras gaeeN merey jism-o-jaaN ki sama'ateN

tere ang ang meiN loch hey merey dil ke soz-o-gudaaz ka
merey khun-e-dil sey raqam hueeN tere rang-o-bu ki hikaayateN

meri chashm-e-gam dil-e-muztarib, gam-e-aarzu gam-e-justaju
leeye phir rahaa huN nagar nagar kisi meherabaaN ki amaanateN