Main Buhat Yaad Aaoonga...

Jab samandar main chand utray ga
Koi tara kaheen pe totay ga
Raat ki surd si hawaoon main
Koi baadal kaheen bersay ga
Teray chehre pe mah-o-saal ka rang
Jaal shiknoon ka bun chuka hoga
Tere hathon ki sab lakiroon ke
Faisle waqt ker chuka hoga

Main bohut yaad aaoonga tujh ko

Jab tere roop ki haseen chandi
Dusht-e-hijran main jal chuki hogi
Jab teri aankh se sitaroon ki
Roshni bhi nikal chuki hogi
Jab tere is hojoom-e-yaaraan main
Tera talib koi na tahray ga
Aur koi deed ka tamannaai
Tere pehlo main aa na baithay ga

Main bohut yaad aaoonga tujh ko

Chandni jab jalaye gi tujh ko
Teri tanhai khaye gi tujh ko
Khud ko dhoonde gi meri nazmoon main
Mujh ko dhoonde gi apni shamoon main
Is qadar phir tujhe sataoon ga tujh ko
Jab nazar bhi na aaoon ga tujh ko

Main bohut yaad aaoonga tujh ko
Main bohut yaad aaoonga tujh ko.....